Semper pussee, in di partid a sinistra del PD, vann a dì che l’aprovazzion de l’autonomia diferenziada, citada in di programa del center-destra, la saria contra del spirit de la Costituzzion, l’ha did inscì l’Eleonora Evi, e ‘l so liad Fratoianni l’ha did, adiritura, che insema al presidenzialism, se podaria rivà a l’Ongaria de Orban, fa nient che l’Ongaria a l’è un stat fondamentalment centralista e che l’è, tra l’alter, una republega parlamentar.
La roba che la fa rider a l’è che ‘l saria assee lensger la Costituzzion per vidé che ‘sto argoment l’è propi cioch, in di fad, in l’articol 116, se lensg:
Di alter forme e condizzion particolar de autonomia […] poden vesser dade a di alter Region, con lesg del Stat, ‘n su inizziativa de la Region interessada, sentud i ent locai […]”
A l’è la Costituzzion, donca, a permeter l’autonomia diferenziada. Alter che “destrugà la Costituzzion” o “l’è incostituzzional”.
Poeu, ciar, l’è no obligatori fà tut quell che la Costituzzion el dis che se po, donca vun el po vesser contrari a l’autonomia diferenziada, in general o in d’un cas specifegh, ma l’è important restà in del debat in d’una manera onesta: magara i midem che, quand che el center-destra el parla de flat tax, disen che l’è incostituzzional (e l’è minga ciar, in di fad) inn quei che vann a cuntà de l’autonomia contraria a la Costituzzion, quand che l’è in la Costituzzion midema!
Me domandi, pu che alter, perchè disen di robe che l’è ciar e patent che inn fallade: hann mai lensgiud la Costituzzion che tant sgiuren de difender? O, magara, gh’hann nissun argoment bon contra l’autonomia diferenziada e gh’hann de menà el “pericol per la Costituzzion” in sgir?