Havarii sentud che la Lombardia l’ha dad disponibilità a la Germania per ciapà di malad de Covid e che, cont el volzàss di cas in del Pajes teutonegh, di Stat inn dree a valutà de mandài.
Una roba che l’è ben regordà a l’è che, in di prim mes del 2020, quand che l’era la sanità lombarda a collassà, a l’è stada la Germania a mandà i reoplan sanitari e a ciapà circa 70 malad di terapie intensive lombarde.
Quell che l’ha fad la Lombardia a l’è, in di fad, recambià el favor e la solidarietà todesca.
E per quella reson chi me vegn un poo de rabia, e forsi de orgoeuj, quand che lensgi robe compagn de “l’Italia la recambiarà el jut todesch e la ciaparà i malad de la Germania” e, magara, vidé de la sgent che squasi l’è contenta de vidé “i pussee bon” che gh’hann de domandà jut “a nunch”.
E perchè la me vegn un poo de rabia? Perchè me se regordi ben el clima che gh’era in Italia in di prim mes del 2020, in piena prima ondada.
De ‘na banda, l’oeudi e l’invidia per la Lombardia. Tucc quei che vegniven a dà la colpa del rivà del Covid ai lombard che “vann al center di massagg chines a ciollà inveci che a stà a cà con la familia e porten el virus”, al sistema economegh trop produtiv, a la “privatizazzion de la sanità” (fa nient che la sanità lombarda l’è per 2/3 fada su de ent de dirit publegh e che in quell period i campion eren Germania e Corea del Sud, tucc Pajes cont una sanità assee privatistega, e che i problema de la sanità territorial lombarda vegnen de la reforma 23/2015), a quei che voreven lavorà, per parlà no de quei che se mostraven propi content de vidé quei che de solet dann l’esempi in dificoltà, cont un rancor scondud mal per podé vesser, per una voeulta, quei mitud un zich mej.
De l’oltra banda, l’oeudi per la Germania, che la voreva no i Coronabond senza condizzion. Mi me se regordi che ‘l Giuseppe Conte el domandava 1’500 miliard, sedenò el faseva borlà l’Union, me se regordi che la sgent la diseva che la Germania per forza la scondeva i mort, perchè l’ideja che la ghe fuss ‘na bona sanità territorial bona de fà traciament la se podeva nanca dì.
Me se regordi che la sgent la brusava la bandera todesca intant che la meteva el bindellin negher a quella lombarda perchè “Fontana assassin” e poeu la tacava a gomità i solet robe in sui lombard egoista, che per el lavorà e i daner hann mazzad milla-milla persone, che el sistema produtiv a l’è de fà su an’mò e che l’è stad mostrad el limit del sistema sanitari lombard, e che besognava imprender de quej sistema sota comissariament perpetov che gh’hann de mandà i so malad chinscì perchè, senza nissuna pandemia de mez, fonzionen no.
Oltra a la solidarietà, Germania e Lombardia inn stade comunade del vesser vitime de l’oeudi popolar italian. Propi per quella reson chi, me se inrabissi quand che lensgi “solidarietà italiana”.
Soratut se quei che ‘l disen, in del midem contest, dann a intender che gh’è de vesser content che “i pesgior” juten “i pussee boni” e magara de domandà ‘n quajcoss indree de la Germania. Quand che lor inn boni domà de esportà ‘na roba: oeudi.