Quater agn fa in Lombardia se votava per el referendum consultiv in su l’autonomia. El saria bell parlà di resultad, ma gh’è stad no, donca parlarem de quand che un ann fa la Lombardia la andava con la cova in tra i gambe a Roma a domandà de meter ‘n ora de polizzia, perchè i cas de Covid vegniven su e besognava fermài. L’ha fonzionad inscì ben che se sem fad ‘na fraca de lockdown e l’ora de polizzia a l’è restada fina a sgiugn.
In d’un moment de grama umiliazzion, però, la se scond anca una lezzion manzoniana no de poch. El Don Lissander el sarà stad no un gran amis del lombard, ma l’è ciar e patent che ‘l saveva comé ‘l fonzionava el mond intorna a lu.
Dopo che ‘n calmer in sui mascherine l’ha sbassad la disponibilità del ben, ‘na roba cuntada ben in di Promessi Sposi, in di revard de la rivoeulta per el calà del pan, con l’ora de polizzia hem vist ‘n esempi moderno de la procession contra la pesta.
La storia, che la gh’è dent semper ai Promessi Sposi, la va circa inscì: el governo el saveva no cossa fà contra la pesta, donca l’ha ciamad el Borromee e gh’ha did de fà ‘na procession, la procession l’è fada e ghe capita un bell rebellot in di dì che vegnen, cont el contagi che ‘l cress e ‘l cress e, infin, la moeur una fracca de sgent.
La storia de l’ora de polizzia a l’è propi compagna: el governo el saveva no cossa fà e ghe serviva un quajcoss de fazil de meter, che ‘l fuss bon de fà sentiì a la popolazzion che ‘l Stat el gh’è e che l’è dree a fà ‘n quajcoss. Inscì, cont un at de fed, ne vieta de passegià la sira.
Ghe voeul minga ‘n Academia per capì che l’ora de polizzia a l’è ‘na bojada. De facc, se gh’è ‘na situazzion se lockdown (dur o men), e donca i atività minga essenziai a inn serrade o adiritura se po no sortì de cà senza reson, a l’è mej che i atività sien verte per tut el temp possibel, inscì de evità di assembrament. Se ‘l March l’è un sciafoeur de piazza che ‘l finiss de lavorà ai 23 e ‘l po andà a fà la spesa ai 24 el sarà squasi de sigur deperlu, menter che se ‘l gh’ha de andà a proveder domenega perchè gh’è l’ora de polizzia el sarà con pussee de sgent, cont un ris’c pussee volt de contagiàss.
Se, inveci, i atività no essenziai a inn verte, a l’è ‘na mincionada creder che sarrà la sira el gh’habia un quajsevoeul efet in su la pandemia. L’è assee vedé el cas Madrid.
Però, propi perchè el serviss a nagot, a l’è restad per squasi 9 mes, prima perchè “gh’è la pandemia” e poeu perchè “sedenò el vensg el Salvini”. Intant, l’hann pagada i italian.
Inscì come i milanes haveven pagad quella procession. Ma l’è anca vera che, in del 1600, se saveva no cossa fussen i virus…