A Milan l’onda Sala l’è stada senza pietà, pussee granda de quella che pensavom, che l’ha sbatud sgiò el magher argin del dotor Bernardo. El Letta, neo-parlamentar elesgiud a Siena e secretari del PD, el dis che l’è ‘na vitoria del PD e che ‘l se vincc domà a slargà la coalizzion.
Ma, gh’hem de dìll, la Lombardia la fa ecezzion anca inscì. La sinistra che la vensg chinscì a l’è quella che, in del rest d’Italia, a l’è destra.
El Sala, per esempi, l’è a favor di salari che varien localment, roba che, dida a la sinistra de incoeu, la fa vosà “vergogna! Se po minga fà di diferenze in tra i italian”. E ‘l apena rielesgiud sindegh el dis ciarament de sostegnì un “noeuv socialismo”.
Pecad che l’è no inscì noeuv. Perchè, in Lombardia, ghe l’havevom sgiamò di temp del Filip Turaa. Mi a son minga de sinistra, ma a gh’hoo nagot contra de ‘na sinistra a favor de quej che lavoren, del mond produtiv, de ‘n stat social che ‘l fonziona ben e de ‘n sistema economegh sgiust che ‘l favoriss el fà su de richezza.
La me pias no, inveci, quella sinistra che l’è contra al lavorà, che ne voeur tucc dependent publegh, che la voeul fà cresser la Bassitalia a forza de concorson e de “solidarietà”. Ma, a bon cunt, la ghe pias nanca ai milanes, desgià che l’ha otegnud domà un consejer e cont una lista incentrada in sui quistion sanitari. Milan Unid, la lista compagna de LeU, l’è nanca entrada in Consili Comunal.
Me se domandi, donca, l’utilità de candidà ‘sti listine, che porten poch de vod, ma poden anca portà a di rebellot interni, a problema cont el programa e, in sgeneral, a dà un segnal fallad in sui idee che se sostegnen e in sul modell de sinistra che se voeul.
E se in l’elezzion, sgiamò scrivuda, del Sala, a l’è no un gran problema, el po vessél in d’una votazzion pussee competitiva: pensi domà a la Region o a ‘na cità assee de destra, indova che i liste pussee a sinistra poden fà pagura ai moderad o impedì de rivà a ‘n programa bon per la pupart di eletor. Provee domàa pensà a ‘n programa unegh per la Region a parlà de sanità, de concordà in tra Azzion e Italia Viva e poeu de Articol 1 e Sinistra Italiana. Bell rebellot, neh?
Ma, de facc, in Lombardia la vincc no la “super-sinistra” che la va del center al confin cont i estrem, ma la vincc una sinistra turatiana, a favor del lavorà e de la produtività, e no ‘na sinistra che la ghe va adree ai vod a forza de promesse e poeu, ‘na voeulta ciapade i cadreghe, se scomincia a vedé come “pagà indree” i eletor.
Soratut, i personagg civegh a inn strumentai ai vitorie de la sinistra in Lombardia. E, despess, a inn di imprenditor e dirigent de azienda, compagn propi del Sala e del Gori.