El dotor Bernardo, candidad sindegh de Milan per el center-destra, l’ha portad ‘na pistola in ospedal.
Un quajvun l’ha cridad a la vergogna, a l’è un scandol e l’ha presentad ‘na mozzion per proibì i armi in di ospedai, che l’è passada no e ‘n quajvun l’ha tacad a fà grama politega in su quella roba chi, comé se de ‘dess sarann i dotor a fà el servizzi de “Scerif” in di corsie de l’ospedal e se te veden a mangià ‘n quajcoss che ‘l fa mal te sbaren adoss.
Ma l’è no inscì. L’Italia la gh’ha una normativa assee restritiva in sul port d’arma de foeugh per defesa personal. L’è no che un medegh el va, el dis de havégh pagura e ghe dann un mitra, i prefet a inn anzi, de solet, assee “lendenon” in di licenze che dann.
Licenze che, l’è ben de tegnì a men, a inn per defesa personal, no per la sicurezza de l’ospedal. Se gh’è un problema de sicurezza quell cont el permess el gh’ha de ciamà la polizzia, domà se gh’è ‘na vita in pericol se po doperà l’arma. E, sgiamò, quej che disen “la pistola la va no ben se gh’è un problema” hann capid no: la se tira no foeura se vun l’è dree a risià, ma se vun l’è dree a pontàm un cortell.
Ma, soratut, se vun el gh’ha ‘na pistola in Italia cont el port per difesa el voeur dì propi che ‘l gh’ha una reson, roba garantida de ‘na licenza che l’è propi grama de otegnì. Quej che disen “l’ha portad ‘n arma senza reson” el disen lor, senza ‘na font e contra de ogni logega.
Ma fem anca finta che portà ‘n arma in ospedal a l’è ‘na roba vergognosa, per una quaj reson che ho minga capid. Pensom a ‘n dotor che, per una reson quajchelasia, l’ha ricevud di menasce, ma roba propi grama, tant de menà el prefet a dàgh la licenza per defesa personal.
Poeu el riva el tormenton popolista del moment, “foeura i armi di ospedal”, magara compagnad a ‘n quaj paragon con l’Afghanistan e i ospedal de Emergency, e ‘l po pu portà l’arma in ospedal.
Mission compida.
Pecad che quej che ‘l menascen, adess, gh’havaran man libera, desgià che vun che ‘l voeur mazzà el se farà no fermà de ‘na mozzion! Sgiamò el Zeser Becaria, in del 1764, el diseva i lesg per el controll di armi gh’hann el limit che vun che ‘l voeur violà ‘na lesg pussee “granda”, ‘me quella contra la violenza o el mazzament, el se farà no fermà de ‘na lesg piscinina compagn de quella in sui armi.
Incredibel ma vera, ma se voeuri sbarà a ‘n dotor, cont una lesg del sgener, el saria assee andà in ospedal per havégh la garanzia che ‘l gh’habia no una manera per difendés.
Un alter descor, ciar, el saria “dem ‘na pistola a ogni dotor”, che l’è ‘na roba un poo cioca. Ma se vun el gh’ha de defendés inscì tant de havégh un port d’arma per defesa e se met la proibizzion de portà l’arma in ospedal, che l’è no un canton inscì controllad de la sicurezza, in la pupart di ospedal se po entrà senza nanca un controll, a l’è una riceta per el disaster. O mej, per trasformà i ospedal in trapole per i operator sanitari.
E sì, el ris’c el gh’è. Per esempi, la pupart di mazzament in di Stat Unid cont i armi de foeugh che revarden pussee persone capiten in di canton indova che se poden no portà i pistole. Perchè?
Perchè sann che el sarà gram fermài e besognarà spetà la polizzia, vist che i citadin che rispeten i regolle se farann trovà senza defesa.
Debon voeurom, per ideologia, toeu via la possibilità de defendés a quej poch che ghe l’hann de besogn e, potenzialment, fà morì di operator sanitari per un slogan?