In tra quej che criden vitoria contra i anti-vacinista che, disen lor, adess sarann in cà ‘me di soregh, e quej che inveci vann a dì che del 6 de avost a vivarem sota un regim pesg de quell di nazista, me par che nissun l’ha vist l’elefant in la stanza.
Ciovè che mi, che vivi in Lombardia, podi passà el confin per andà in Svizzera con men ducument de quej che me servissen per andà al restorant.
A scherzi minga, neh! Per andà in Svizzera l’è assee havégh la carta d’identità e l’è anca probabel che, a la dovana, la controllen no.
Menter che, del 6 de avost, per andà al restorant gh’havaroo de havégh el green pass e la carta d’identità e per i protocoi del governo gh’hann de controllàlla!
Tra l’alter, me se domandi, de ‘na banda mi a gh’hoo el dirit de andà in sgir senza ‘n ducument de identità e, se gh’è de besogn, de dà i me informazzion a vos ai publegh ofizziai, ma de l’oltra el restorator el po fàmm no entrà senza el ducument, de ‘n oltra banca ancamò, se ‘l restorator el me cascia via senza ‘na reson, a norma de TULPS, el res’cia ‘na multa.
A l’è probabel che la soluzzion pussee bona, per res’cià no de vesser serrad per el DL del green pass e de vesser inciodad per el TULPS, la sibia de ciamà el 112 e domandà che la riva ‘na gaffa a identifegà quell che l’è dree a entrà.
Se metom ‘na dogana in cà, insoma, e nissun el dis nagot.