Se parla de tant temp de la quistion del lavorà di rider, quej che ne consegnen el mangià a cà, in tra quej che disen che inn pagad trop poch e sfrutad e quej che, inveci, disen che inn pagad ben e con coerenza cont el lavorà che fann.
Un quaj temp fa a gh’è stad un contrat noeuv, che ‘l lassava i rider autonom ma con pussee garanzie, compagn de un minim orari, indennità per la pioeuva e i feste, un sistema di premi e oltra roba.
Però ‘n quajvun, compagn de Just Eat, l’ha scernid de fàj deventà dependent, in d’una scerna che ‘n quajvun l’ha ciamad “vitoria di dirit”. Ma, dopo de ‘n quaj mes, el par che l’habia vensgiud nissun.
Per prima roba, minga tucc quej che lavoraven ‘me autonom inn stad ciapad a lavorà: un bell poo de sgent, despess pora, l’è stada lassada a cà. Ciar e patent, a l’era prevedibel che in d’un sistema pussee rigid ghe saria stad no spazzi per tucc.
I contrat, tra l’alter, inn no flessibel e inn a ore: a gh’è capitad che di persone che magara lavoraven a temp pien sien stade ciamade per 10 ore e hann perdud anca la possibilità de scernì quand che lavorà, poden domà fà una proposta.
I daner? Fann danà! Se parla de ‘na paga in tra i 7 e i 9 Euro l’ora pussee ‘n quaj sghell de indennità chilometrega e per ogni consegna fada.
E tanc inn inversad, perchè magara quella paga la faseven cont un para de consegne, senza vesser obligad a lavorà, con la possibilità de organizàss in libertà, magara per studià. Tra l’alter, se prima l’era possibel spostàss cont el midem cunt (e donca anca “andàgh adree” ai zone pussee pagade), adess besogna firmà per una zona specifega.
E, gran paradoss, se la se s’cepa la bici o ‘l motorin? Nagot! A gh’è de reparàll, a spese del rider, e intant besogna lavorà, sedenò…
A gh’è anca ‘n quajvun che, in tra el seri e ‘l rid, el pensa a ‘n complot de Assodelivery, la sociazzion di aziende di rider, per mostrà che ‘l lavorà sota padron a l’è ‘n falliment e che se pò domà lavorà ‘me autonom.
Ma, soratut, el m’ha lassad a boca verta vedé tanti fortester, che parlen propi poch de italian e se ved che capissen no el nost dirit del lavorà, che voeulen capì se poden restà autonom o gh’hann de lavorà per forza sota padron, con l’amara respoeusta di noster concitadin: “sì, te gh’hee de cambià azienda”.
‘Me che la se pensi in su la quistion, che se sia per el cotim o per el lavorà dependent, a l’è ciar e patent che, incoeu, el sistema l’è dree a fallì e anca mal, che in cambi de ‘na quaj garanzia pussee (la malatia) la met una mota de oblegh pussee in sui rider, in d’un moment che fà el rider l’è despess la darrera lus de speranza per sgent che l’ha perdud el lavorà per colpa di restrizzion del Covid.
E, intant, con ‘sto rebellot i restorant se fiden semper men di piataforme e spingen per i so sistema interni, che despess gh’hann debon sgent sfrutada, pagada 3 o 4€ l’ora, senza nissuna sigurazzion, paga pussee per el maltemp e sota la menascia de vesser lassad a cà per ogni ritard.
Insoma… in sui rider, inn dree a perder tucc.