Inscì la resta l’ora de polizzia, el se sa no per quant, el se sa no a che ora, el partid che vint agn fa el se vantava de havégh dad la libertà ai sgioven de la naja adess el ciama per ‘na “reduzzion a basej”, la sinistra la dis ciar e patent che ‘l tegnen per dàlla no vinta al Salvin, ‘na roba che l’havaria fad ciapà i s’ciop ai noni de quej che incoeu ‘l disen, Salvin che però l’è ‘l leader del prim partid a havé mitud l’ora de polizzia in Italia che, regordemes, l’è stada mituda su per la prima voeulta in Lombardia, in d’una data squasi simbolega: el 22 de otober. Con firma del minister roman de la Salut, con bona pas de l’autonomia votada 3 agn prima…
Oltra che i noster libertà — e ‘na class politega che la gh’ha ‘me soluzzion per tuscoss “toeu via la libertà di zitadin” la cambiarà no ideja cont un vacin — a pagàlla inn quej del setor turistegh. Perchè, disemel, el governo l’è no inscì tant credibel e ‘l regorda pussee ‘na mina vaganta che ‘n esecutiv, tant l’è che la fin de l’ora de polizzia a l’è nanca ciara, cont i vari sbozz del decret sortid in bon stil Casalino.
E, sgiontaria mi, cont un governo del sgener, a gh’è nissuna certezza. A inn boni che, se ‘l vegn foeura un sondagg che ‘l dis che la Liga la cress se la toeuven via, la tegnen fina a luj. Chi l’è el mat che, a ‘sti condizzion, el prenota una vacanza in Italia, senza nanca savé se ‘l gh’havarà de programà la sgiornada al mar per vesser no multad?
Soratut, chi l’è che ‘l faria quand che gh’è di Pajes arent che gh’hann no l’ora de polizzia e costen anca men? Chi l’è el mat che ‘l prenota a Rimini cont el ris’c de podé no mangià un sorbet la sira con la morosa perché i sorvegliant ghe fann la multa quand che ‘l po andà in Croazzia, pagà anca men e havégh no el problema?
Al governo el sann che prenotà last minute el costa ‘n oeugg e donca la sgent la prenota anca mes prima e che, senza certezze, la scernissarà no l’Italia?
O speren che vun che l’ha prenotad, quand che ‘l governo el se desseda foeura a sgiugn, el renonzia al so viasg foeura e ‘l prenota — magara a di prezzi de mat — in Italia?
A bon cunt, però, a l’è la conseguenza de una class politega berlusca, che la varda domà a ‘na part de la situazzion e la pensa no ai “conseguenze inatese”, despess anca intenzionada in del doperà la durezza di mesure per sconder i so problema, pensi domà a la transizzion de l’Union in Germania o al scandol che l’ha colpid el Kurz in Austria.