L’è no el virus a scernì i mesure, inn i politegh. E l’è rivada l’ora de dervì

Incoeu a gh’è la manifestazzion final de #ioapro, de che v’hoo cuntad un quaj dì fa. Come ve disevi, mi a stoo con lor, perchè voramai l’economia italiana, quella che la da de mangià ai sgent, l’è disperada e, per tegnì sota controll el Covid, sem dree a fà pussee de dagn de quej che ‘l faria el Covid se lassad pussee liber de andà in sgir.

A quej che scernissen foeura ghe pias propi tant scondés con di fraset compagn de “a l’è el virus, inn i dacc, no nunch”. Ma l’è minga vera. A la fin, i decret gh’hann su el so nom in calz, no quell del virus…

Ma, soratut, la scerna de sarrà su a l’è deliberada, l’è no una costrizzion. Tant l’è che gh’è di Stat che hann scernid no la via di sarradure e, anca se l’è ciar e patent che gh’hann pussee de mort de quej che hann sarrad, gh’hann no de “scavalcà i mort in di strade”.

Soratut, hann no havud i gram dagn economegh, medegh e sociai che l’Italia l’ha vist a causa di sarradure. Gh’è di setor che l’è un ann che inn sota stress e res’cen de vesser decimad, sgent che l’ha perdud el lavorà, magara cont un’età volta che ja farà no entrà ancamò in del mond del lavorà a la svelta, imprese che sarren e lassen a cà la sgent e i fondator che perden i investiment de la vita… Sarann no vite perdude, ma inn ruvinade. E la longhezza de vita ruvinada, despess, l’è de ‘n orden de grandezza sora a la vita media perduda per cas de Covid, senza cuntà che parlom almen de ‘n orden de grandezza pussee de ‘sta sgent che de quej che moeuren de Coronavirus.

I dagn che inn dree a fà inn squasi de sigur irreversibel e de period pussee longh rispet a l’epidemia lassada deperlee e i politegh poden propi fà quel che voeulen, a incagàss di conseguenze, perchè gh’è de la sgent che la va adree a la logica del “a gh’è el virus” ’me che se la fuss una scusa per fà i robe mal e poeu dì che la colpa l’è no soa, ma del virus.

E inveci se po fà un modell diferent, fondad no in sui sarradure e in su la repression ma in su la vacinazzion, el testing de massa e i verture in sicurezza. Inveci de doperà la Polizzia per inciodà quej che fann ‘na caminada la sira la doperom per controllà che ghe sien no assembrament in di vie de movida e in di atività verte e per permetègh ai persone pussee a ris’c de sortì no de cà.

E inscì salvom i vite e l’economia (semper se quell che hem fad per un ann l’è reparabel…). Ma ‘l voraria ameter de havè fallad tuscoss fina a jer. A sarann boni de fàll, i politegh, senza che sien costringiud di citadin?

Lascia un commento

Il tuo indirizzo email non sarà pubblicato. I campi obbligatori sono contrassegnati *