La me nona, nassuda in del 1924, la me cuntava su che ai so temp la posta a l’era controllada, per fà inscì che se scrivessen no di robe contra el regim o disfatista. Propi per quella reson chi la Costituzzion la garantiss el secret di letere e gh’è di lesg che tutellen la corrispondenza.
Incoeu gh’è tanta sgent che la dis che fascismo e antifascismo inn compagn, ma pensi che ‘l sibia minga vera. A gh’è un antifascismo de pas, che l’è quell che l’è representad de la pupart di italian, e un antifascismo violent, che l’è propi una minoranza, animad de ‘n oeudi domà ideologich per el fascismo ma, a bon cunt, propi compagn, sia in sul pian ideologich (pensi domà a robe compagn de la nazionalizazzion di infrastruture, de la sanità publega e statal e de l’abolizzion di Region, che comunen la pupart di fascista e di antifa) che in sul pian prategh, con la violenza ‘me mez primari de otegnì quell che voeulen.
Havarii sentud del rider che l’ha destrugad un biliet perchè pro fascismo e l’è stad licenziad. Mi disi che hann fad ben, almen per trè reson:
- Un’azienda de delivery la gh’ha de conservà la privacy di sgent che ordenen, se ‘l fa no la res’cia de perder client e anca di sanzion
- Un comportament compagn de quell chi a l’è minga professional: desgià che a l’è contra di regolle del servizzi mandà quella roba chi, un rider professional l’havaria mandad indree l’orden inscì che l’azienda la fuss bona de scernì foeura cossa fà
- Destrugà corrispondenza a l’è un riat e l’è no inscì bell havégh in di file aziendai sgent che la fà di riat, de solet…
Però, poeu, i stess che ciamaven “fascista” quej che s’incagaven di regolle (ministrative) contra el Covid (perchè voeulen lavorà, eh) e che disen che quej che doperen la legitima difesa inn di “scerif” e besogna toeugh via i armi sostegnen ‘n azzion squasi de sigur illegal e arbitraria perchè “l’apologia de fascismo l’è illegal”.
Inn pesg de quej che disen che, desgià che “la sovranità la partegn al popol”, gh’hem de votà, e se desmenteghen che “la esercita in di forme e in di limit de la costituzzion”. La lesg Scelba, in di fat, la se aplica domà in di cas che poden fà un pericol de fà tornà in pè el Partid Nazzional Fascista e minga in di cas de “defesa elogiativa”. Tra l’alter, domà in publegh e minga in la corrispondenza privada.
Donca, anca se ‘l fuss legal el “scerifismo”, el rider l’havaria violad istess la lesg, perchè sgiamò che l’è no publegh, a gh’è nissuna reson per pensà a l’apologia. E se savii no ‘sti robe, inveci de pontifegà de lesg, dovii tornà ai scoeule medie.
Inscì, in classegh stil fascista, i sostenitor del rider s’inn dad al squadrismo e inn andad a impienì i recension e la pagina de l’app, a dì che inn amis di fascista e inscì via. El midem fà, l’havaria did la mè nona, di camise negre.
Quest chi a l’è propi no l’antifascismo che mi e milion de italian sostegnom, a l’è domà ‘na version del fascismo senza la divisa. E poeu disen che “el fascismo el passarà no”: se ametom ‘na giustizzia privada, che la se incaga de la privacy e che la se fonda in su la rabia de ‘na folla violenta, l’è sgiamò passad…