De incoeu a ‘n quaj mes i TV vegg sarann de cambià perchè ‘l cambia el standard: podii verifegà se ‘l vost TV a l’è compatibel cont el standard noeuv in sul canal 100: se ‘l se ved nagot, l’è no compatibel cont el noeuv standard e podii o cambiàll o crompà un decoder.
O, forsi, se pò fà mej e trasformàlla in d’un media center, TV e anca computer e per poch de daner: inn assee 10€! Comé?
Cont un Raspberry Pi Zero W, che ‘l costa apena 10€, e ‘l sistema operativ OSMC, che ‘l gh’ha dent un complet media center per vardà i film e inscì via.
Tegnii a ment una roba: inscì, per guardà la TV, besogna havègh ‘na conession a l’Internet. Per quej che ghe pias meter i man in pasta a gh’è un modul TV per el Raspberry, ma a l’è desconsiliad in sul modell de 10€ perchè el gh’ha no inscì tanta de potenza de decodifegà el segnal.
Ciarament, podii anca spender pussee, toeu un Raspberry 4 e con 60€ fàv un decoder e media-center, ma la convenienza economega l’è no inscì granda…
Ma, tornom a nunch: installà OSMC a l’è propi fazil e l’è assee descaregà i file e metij in su la scheda come spiegad in sul sit, pizzà el computerin e fà l’installazzion.
Besogna poeu installà un add-on per guardà la TV, ciovè un Client PVR. Vun di pussee consiliad a l’è “PVR IPTV Simple client”, ma a la fin l’è ‘na scerna de l’utent. In del client, poeu, besogna sgiontà una lista IPTV: podii doperà quella a gratis de PandaSat, che trovee chinscì.
El procediment a l’è no gram de fà, ma se vun el voeur una guida l’è assee cercà “osmc iptv pvr” in su ‘n motor de ricerca. L’è util regordà, però, che la gh’è semper ‘n opzzion pussee oltra al cambi de la TV e al crompà ‘n decoder.