Gh’è mort el governo! Viva el governo! Ma i prim del governo Draghi at a paren propi in continuovità con l’azzion anti-lavorà del governo Cont.
Se ‘l darer decret del Cont a l’è stad quell de meter in zona naranza la Liguria e menà i ristorator a sbater via tut el mangià che haveven crompad (e per fortuna tant hann lassad vert istess, a la fin, el se sa, el Balilla l’era ligurin!) el prim del governo Draghi l’è el stop al schi.
El dì prima che gh’haveven de dervì.
Ciarament una mota de sgent la s’è inrabida, e anca tant. Per esempi el president de l’Emilia Romagna Bonascin el s’è lamentad, oltra a tuta la componenta leghista del governa (che la ciama al “stop del modell Cont”), el Toti e l’ex assessor lombard Gallera.
El descor l’è quell de semper: el sur Speranza l’ha mai lavorad in la soa vita. El gh’ha no ideja che, in la vita vera, vun el po no fermà i atività senza nissun problema, vun el po no preparàss a dervì, spender una mota de daner per i protezzion e sentìss di el dì prima “no”.
L’è ‘na roba che vun el se specia de ‘na republega di banane indova che se va inanz a corruzzion, no de ‘n paes vuropee che ‘l se ciama civil. In d’un Pajes civil se ‘l se decid de fà una roba, la se fa, per rispet de quej che hann dad el so temp e i so daner per fàll.
Ma per vun che l’ha vivud semper de politega e ‘l gh’ha l’abituden de dà i orden al so basgioeul che ja eseguiss l’è propi grama capì che, in la vita real, i azzion gh’hann di conseguenze.
E che i “ristor”, in confront al perder, inn una roba de rider. E se vem inanz inscì la partizzion in tra quej che lavoren, che de solet oeudien un Stat che ‘l fonziona inscì, e quej che viven de Stat, che ‘l veden ben perchè paghen no i conseguenze, la res’cia de deventà definitiva e incurabel.