Al dì d’incoeu l’è assee spantegada l’industria di VPN e vedom i so publicità squasi indepertut: YouTube, sit Internet, fina al passa-parolla.
Ma ne servissen de bon? Quej che ja venden disen che la VPN la dopera una “critografia de nivell militar” per proteger i noster informazzion, che impedissen al nost provider de spiànn e, soratut, ne permet de guardà la TV e i film forest!
El darer, forsi, l’è el pont pussee important per vender i VPN: desgià che gh’hann pussee de pont de sortida a l’è possibel fà finta de vesser in Giapon per guardà i anime apena sortid in del Pajes del Sol levant per poeu fà finta de vesser in Delaware per guardà la noeuva serie de Netflix, menter che, in realtà, sii in la vosta cà a Caronn Pertusella.
Ma, parlom di pont, de sicurezza. E tacom cont el principi fondamental: cossa l’è una VPN?
Cossa l’è una VPN?
Una VPN a l’è una red virtuala privada, in poche parolle a l’è un tunnel che ‘l permet de doperà una red privada a travers de una red publega. De solet eren doperad di aziende, inscì de permeter anca a quej che eren foeura de l’ofizzi principal de doperà i resorse compartid compagn de la stampanta o di server come se fussen lilinscì.
Quand che ve se abonee a ‘n servizzi de VPN sii dent, in di fat, a la soa red, e la doperee per conetèv a l’Internet, inscì de doperà un’adressa IP de l’azienda.
A l’è debon pussee segura?
Quell che disen i reclam di VPN l’è vera, ma a l’è fad in manera de mandàv foeura strada quand che fii i voster valutazzion.
Per esempi l’è vera che doperen una critografia militar. Ma el fann tucc i sit che doperen HTTPS, ciovè quej cont el bogin in la barra di adresse, voramai la roba pussee spantegada in del web.
Con HTTPS (o, mej, SSL) l’unega roba che la po vedè el voster provider a l’è el sit che ve sii conetud, nanca la pagina precisa.
Cont una VPN el voster provider el ved nagot, oltra al fat che sii conetud a la VPN, ma ocio: la sarà la VPN a savè quell che ‘l sa el provider. Se doperee una marca de VPN cognossuda el gh’havaria de vesser no un problema inscì grand e se gh’hii pagura per di robe che ‘l fa el voster provider (el soo no, bloch contra quej che gh’hann roba piratada o vender informazzion per fà reclam), menter che se doperee la VPN che hii trovad in sul sit de ‘n hacker irachen… disaria che l’è no inscì segur.
Donca, a bon cunt, gh’è di situazzion indova che doperà una VPN a l’è ‘na bona ideja, l’è però fallad creder che senza una VPN vun a l’è a la mercé di criminai informategh: una VPN la sostituiss no un utent ben educad, un bon software de sicurezza e un sistema giornad.
Donca… te me consejet de doperànn vuna?
Mi la doperi no, perchè la troeuvi minga necessaria.
Per prima roba, al dì d’incoeu, grazzia a SSL, l’è no inscì pericolos tacàss anca a di hotspot Wi-Fi vert e gh’è no di pericol reai in del doperà la red mobile o ‘na red Wi-Fi segura.
Per segonda, a gh’hoo no tant se problema per i dacc che ‘l mè provider el cognoss, no inscì tant de dàj a ‘n alter.
Terza roba: a curi la mè sicurezza informatega e vun, anca se ‘l gh’ha el mè IP, l’è no che ‘l va a trovà una mota de vulnerabilità tant de tacàm. A gh’hoo domà una porta verta che, per paradoss, a l’è una VPN… per permetèm de doperà i me resorse de red anca foeura de cà.
Donca, ve disi, se vorii magara doperà Internet in su ‘na red de scoeula censurada o vedè i darer film de l’America el va ben havèghela. Ma stee no lì a creder che senza ‘na VPN podii no stà al segur o, ancamò pesg, che cont una VPN sii segur.
More