Inscì el governo, che l’è dree a sbatès compagn de ‘na truta apena pescada che la cerca con disperazzion aqua (o mej, vot), l’ha combinad un bell cadò per la Lombardia: zona rossa.
Anca se, a bon cunt, i noster indes inn boni, lor i hann sbassad prima inscì che, cont un poo de gioeugh, hann podud proclamà el bloch, per la quarta voeulta, del motor d’Italia.
Quella roba lì la gh’ha un nom: lombardicidi. Un mazzament vil e inutil de ‘na Region con 10 milion de abitant.
E l’ha fad inversà tanta sgent. L’è assee fà un sgir in sui pagine di noeuve per vedè che, forsi, 1 in su 10 l’è no contrari (disi nanca a favor) a quell provediment chi.
Anca el center-sinistra local, onestament, el fa fadiga a concordà con la mesura scernida del center-sinistra nazzional.
A la fin, l’è no giustificabel. Sem mitud no inscì mal e gh’è di zone (compagn de la Bergamasca) che sarien squasi de zona bianca e, per nagot, ne castighen con la zona rossa. E l’è ‘na verità ciara e patenta, che la fa inversà e la fa mal a tucc.
E la po havègh di grame conseguenze… Regordemes che la Lombardia l’è motor d’Italia e d’Europa, cont un residov fiscal — ciovè daner che inn produt in Lombardia ma spendud foeura — de circa 50 miliard de Euro, cont una sanità che la cura pussee de 150’000 minga lombard ogni ann e, in general, el center finanziari del Pajes.
Se la borla la Lombardia la borla l’Italia, soratut se gh’è de pagà indree tut el debit fad per l’emergenza e fà su la “noeuva Italia post-COVID” fondada in sui investiment publegh, i sussidi e inscì via.
Ma, anca pesg, senza de nunch el conflit in tra l’Europa del Sud, quella de la solidarietà e di jut, e quella del Nord, i “frugai” che voeulen i cunt in orden, el res’cia de deventà pussee fort.
Adess, almen, la Region l’ha desmetud de acetà acriticament ogni mincionada che la vegn de Roma e l’ha fad recors. I possibilità? Probabilment poch.
Ma, cara i me lombard, l’è l’ora de met un moment de part i diferent idee politeghe e sgiontàss insema per el ben de la Terra che l’è la nosta. E ‘l disi anca, forsi soratut, ai politegh.