Hoo sentud el dibatit de la fiducia. L’è stad‘na roba surreala. Lassi stà ‘n atim el complottism, i maciete compagn del Sgarbi — che l’ha invitad el Cont a andà in Cina cont indoss una sciarpa kitsch — e i deliri vari e parli di descor de la governo, che hoo trovad propi assurd.
Hann parlad, per la pupart, pussee durament de l’oposizzion: hem vist una mota de mort, di dagn a l’economia squasi irrecuperabel, poch de restorazzion economega e gestion politega autoritaria senza intervent del Parlament.
Donca, gh’hii de votànn la fiducia. “A credi de havè capid no”.
De solet, almen, el governo el dis de havè fad ben, l’oposizzion la dis che ‘l governo l’ha fad mal, inveci inscì l’è anca noios: disen tucc l’istessa roba, per di reson diverse.
Per la magioranza, ciarament, l’ideja l’è che desgià che la situazzion l’è grama se po minga cambià el governo, che se po no parlà de crisi intant che gh’è i mort e che l’è domà colpa del virus se gh’è di problema, menter che per l’oposizzion che desgià che la situazzion l’è grama l’è colpa del governo e besogna cambiàll.
In medio stat virtus. La pandemia l’ha de sigur fad di problema pussee, ma se ‘l governo l’ha gestid mal i robe l’è perchè, anca in di temp normai, el saria stad no inscì bon de fà fonzionà la machina-Stat.
Ma, se podaria domandà a l’oposizzion, istess, se lor sarien stad inscì boni de fà quell che ‘l governo l’ha fad no: el roeul che la gh’havaria de ciapà se tornom a votà el saria forsi pussee important de quell del governo Conte II, ciovè fà repartì ‘n economia martoriada, “curada” cont una dos tossega de lockdown inadata ai “condizzion pregress” del debit e de la spesa publega.
E, a scoltài, la situazzion l’è no rose e fior: la Meloni l’ha, in pratega, domà vosad e Forza Italia e la Liga hann mostrad di idee propi diverse: la prima che l’ha parlad de MES, de daner de l’Europa e de liberalism, la segonda che l’ha did no al MES, de s’ciavituu de Bruxelles e de manoeuve espansive.
Forsi, almen per una question de etica del lavorà, el saria preferibel vedè andà via ‘n poo de minister ch’hann mai gestid un’atività imprenditorial e adess comanden i color — ‘me la strega di fiolit — senza considerà i necessità de la società produtiva.
Ma el saria anca ingenov sperà in del borlà del governo che ‘l gh’è adess ‘me panacea per tucc i mal del COVID e de la gestion de la pandemia. Al massim, el po vesser un bagn de realtà per quej che hann did “la salut prima de l’economia” senza capì che inn do facie de la midema medaja.