Gh’è mort l’assessor. Viva l’assessora! L’assessorad al welfare l’è passad l’alter dì del Giulio Gallera a la Letizia Moratti.
De ‘n pont de vista de imagin l’è forsi un ben: el Gallera l’ha fad una mota de gaffe, de eror e l’è pussee cognossud per el Crozza che per el so lavorà.
Ma cambiarann debon i robe? Boeuh! Mi, onestament, a pensi de no, perchè el problema l’è no tant la persona ma l’ent che ‘l guida: l’assessorad al welfare.
La reforma del 2016 e ‘n assessorad critegad de tancc
Una roba che tanta sgent la sa no l’è che la sanità lombarda del dì d’incoeu l’è no quella del Formigon: in del 2015 la gh’è stada una riforma, vorzuda del Maron, che l’ha tolt via i ASL e l’ha fad su una strutura noeuva fondada in sui ATS e i ASST, ativa del 2016.
In del fratemp l’è stad fad su el “super-assessorad” al welfare, che ‘l gh’ha in man i 2/3 del belanz de la Region. La scerna, a bon cunt, l’ha lassad di dubi a tancc: l’è stada critegada sia di sociazzion del terz setor che de la Confindustria, per esempi.
El prim assessor del welfare a l’è stad propri el Gallera. Che, forsi, l’era anca la persona giusta, desgià che la reforma Maron a l’era fortement aziendalistega e la provava a tratà la sanità publega lombarda essenzialment in do bloch:
- El sistema de pagament e de negoziazzion di prestazzion (in di ATS)
- I aziende ospedalere (i ASST)
Deperlu, el modell l’è no inscì mal: in Europa inn tancc a separà el pagator de pagad (anca pussee de la Lombardia, soratut in di sistema Bismarck) e ghe n’è tant che gestissen i ospedal ‘me aziende, sia a la lombarda (ogni ASST autonoma) o cont una società per tucc i ospedal.
Ma cossa l’è che ne diferenzia, el soo no, de la Germania o de la Svizzera? Una mota de roba.
La debolezza lombarda
La sanità lombarda la fa pu sistema. In di alter Pajes che hoo sgiamò manzonad, per esempi, gh’è di autorità de sanità local (despess comunal e coordenad per territori) che inn bei fort e poden intervegnì se ‘l gh’è de besogn, menter che in Lombardia l’è tut sconfondud in tra ‘sti vari entità, per esempi la medesina territoriala l’è — in teoria — in man ai ASST, ma la medesina de bas la depend di ATS. E ‘l privad l’è no coordenad in la red territorial, che la lassa foeura donca 1/3 de l’intrega sanità lombarda
L’è ciar che ‘l sistema el gh’ha di bus e che besogna sistemàll. L’è assee cambià domà assessor?