El Misian, vize-minister del PD, l’ha did che se la Lombardia la riess no a vacinà i sgent contra el Coronavirus el gh’avarà de vesser el Stat a fàll. El midem Stat, tra l’alter, che n’ha mandad i siringhe fallad per el vacin.
Voeuli ciarì subit una roba: mi a gh’hoo no un partid de riferiment e voti quell che ‘l me pias pussee per la situazzion, donca a gh’hoo no de difender o dàgh contra a ‘n partid perchè l’è bell, pensi al mej per mi, per quej che lavoren e per la mè Terra.
Per la pupart quej de la Lombardia inn di problema struturai dovud a la reforma de la sanità territorial e se de sigur una leadership grama l’ha fad pesg la situazzion, l’è assee irrealistegh imaginàss che ‘n oltra leadership assee scarsa, quella de Roma, la sibia bona de fà fonzionà tuscoss, soratut senza nanca i cognossenze del sistema.
Ma, soratut, fà rivà el Stat, anca parzialment, el voraria dì spostà tuta la responsabilità di eror a Roma e ‘l permetaria a la magioranza d’incoeu de dàgh la colpa de ogni problema ai scerne del PD. El saria, insoma, l’atach a l’autonomia che ‘l permet a la Liga de ciapàss pussee de vot e vincer in del 2023.
Quell che ne serviss a l’è, a bon cunt, un cambi a longh termen. Mi a son d’acordi che i principi fondamentai de la sanità lombarda, compagn de la parità publegh-privad (in del ben e in del mal) e de la libertà de scerna per el pazzient, sibien boni e caraterizzen la pupart di sistema sanitari de qualità del mond.
Ma el vorè tratà tut el sistema sanitari ‘me azienda, telecomandada del Pirellon e che la crompa domà prestazzion n’ha ralentad e n’ha lassad senza la strutura che in alter Pajes che gh’hann un modell compagn del nost la gh’è e l’ha permitud de resister mej. Magara un di a fem un video-confront in su la sanità lombarda e in sui modej arent…
Ma l’è mej tornà a l’argoment: oltra a havègh poca de probabilità de fonzionà ben una gestion de Roma la metaria propi a ris’c una reforma de la sanità e la rendaria ancamò pussee polarizzad el dibatit.
Ma cossa el sucedaria se ‘l Stat el sta fermo? Se la gestion vacinala lombarda la fonzionass no, ciarament, i lombard el se regordarann in la gabina eletoral, oltra a tucc i eror fad in precedenza.
E, per violter, se voeulen cambià de vot a preferissen sostegnì un partid fad de sgent che la gh’ha la fiducia local (compagn di sindegh) e la fa di bone parpoeuste o ‘n partid che ‘l gh’ha dent di sgent poch cognossud e l’è liad cont i liste che gh’hann ‘me modell la sanità campana o inglesa?
Un “PD lombard” che ‘l recognoss la soa specialità, cont i sgent pussee abil che ‘l center-sinistra el po dà, cont una parpoeusta sanitaria moderada e scrivuda di espert e senza lianze grame el saria in la convenienza eletorala de tucc, desgià che ‘l obligaria anca el center-destra a regolàss e a dàgh ai lombard una sanità che la fonziona se voeulen provà a vincer ancamò.
Menter che se ‘l scerniss de andàgh adree ai sirene del comissariament, del candidad de comod catad foeura per tegnì in pee una lianza a Roma e del liàss cont i micro-partid de sinistra e havègh de adeguà el propi programa sanitari ai so idee che lassarien quell che l’è circa 1/3 de la sanità lombarda, ciovè el privad, domà ai sciori, el da la vitoria in man a l’aversari.