El modell che ‘l governo italian el ciama, dopo havè vist che a dagh indree ‘l 10% de quell che spenden – domà in di negozzi fisegh e cont i center comerciai serrad – di mesure pussee dur per Denedal a l’è quell de la Merkel.
Compagn de una mota de roba in Italia, che credom che l’è roba che la se fa in tut el mond ma, in verità, se la sem inventada nialter, l’è no inscì.
El modell de la Merkel, che ‘l deriva de ‘n longh period de stasi (con la minuscola) in la curva, l’è pensad pussee ‘me un “circuit breaker” soratut per Denedal.
Per la canzelera, se i citadin todesch sbassen i sò contat prima de Denedal, el sarà men probabel menà l’infezzion in familia, indova che la gh’è la sgent pussee a ris’c compagn di noni o di sgent anzian. L’è ciar, el gh’è un cost economegh, tut el shopping del period el sarà fad online, ma el Stat Todesch l’è vesin ai sò imprese e l’è pront a pagà luu i conseguenze in daner.
El governo italian, inveci, l’è cont i pezz al cul e ‘l s’è inventad el cashback per incentivànn a crompà in di boteghe e minga in su l’Amazon e pagà domà el 10% de la spesa (cont un massim de 150€) inveci che miliard de ristor, poeu el se lamenta se la sgent la va a doperà el cashback.
A nivell organizzativ el circuit breaker todesch el sona: se riessom a sbassà el numer di infezzion in tra quej men a ris’c e fem i feste in segurezza riessom a render no inscì pericolos tuscoss. La noeuva proposta italiana, inveci, l’è trop curta per fà de circuit breaker: la par domà una scerna reazzionaria de ‘n quaj politegh che ‘l voraria un period de Stasi (con la letera maiuscola) per castigànn di so eror e esperiment per belanzà, in gran secret, l’economia con la salut, belanzament che fina a ‘n quaj mes fa diseven de vorè fà no ma, incoeu, l’è ciar e patent che voeuren fàll ma che, forsi, inn no inscì boni e fan di robe che juten no l’economia e nanca la salut.
E per quej che parlen de ditatura sanitaria, poeudom regordà una semper-verda massima: “mai dàgh la colpa a la malizzia per quell che l’è spiegad ben de la stupidità“