La Svezzia, el se sa, l’ha fad nient per contegnì el Coronavirus. Inscì, anca se in Scandinavia, la gh’ha di numer compagn de l’Italia o de la Franza, menter che i so vesin – Norvegia, Finlandia e Danimarca, no
.Ma el modell de ‘sti Pajes l’è pussee vesin al noster o a quell de la vesina Svezzia? Ciarament, a quell svedes, in termen de sarradure.
Sgiamò in la prima onda, de facc, nissun Stat scandinav l’ha mitud una roba compagna de l’autocertificazzion: domà la Norvegia l’ha vietad de andà in di segonde cà rurai, per impedigh el collass di ospedaa locai, e la Finlandia l’ha blocad per un quaj dì un teritori.
Nient de cascia al runner, nient de diviet de fà la spesa foeura del comun.
Per el rest inn stad sì serrad i boteghe e i restorant, ma – compagn de la Svezzia – i so governi s’inn afidad fiss ai consili pussee che al tarell de mussoliniana memoria che ‘l ghe pias tant ai governant d’Italia.
Anca incoeu, a bon cunt, i restrizzion scandinav inn poca roba rispet a quei d’Italia, comè podii lensger di recomandazzion norveges per Denedal che gh’è in evidenza.
Nissun Stat l’ha deciarad guerra al Denedal, tucc han dad di recomandazzion per passàll in manera segura.
Resten i limitazzion in di inconter in publegh, la mascarina pu o manch obligatoria, i restorant inn vert, cont di limit de rider (compagn di diviet de vender alcol dopo de la mizanocc) e domà in di zone pussee colpid magara sarren ai 22.
Nissun l’ha mitud la gran ciollada del Macron, ciovè l’ora de polizzia. Anca i regole dur inn, in fin, recomandazzion. Anca assee de bon sens.
Ma perchè ‘sti Pajes poden permetès di mesure che fan parè fina la Svizzera – che vista de Milan la par un Paradis libertari – un Pajes fallid? L’è fazil dì che l’è perchè inn grand e con poca gent ma, a bon cunt, se ‘l fuss domà inscì ghe sarien i pien de mort in di grand cità cont i sgent concentrad, che però gh’han domà ‘na quaj regola pussee.
In verità, la Scandinavia la gh’ha propi fortuna: la gh’è una division social in tra i sgiovin e i anzian assee forta, una sanità in man ai teritori – in Finlandia ai comun! – che l’ha permetud una granda capacità di voramai famos 3T.
El modell svedes l’è no de sbater via del tut: i familie svedes, per esempi, han sofert pròpri poch de la crisi economega. Ma, l’è anca ciar e patent che con poch de mesure, che sbaten no sgiò l’economia intrega e lassen pussee sgent in fila a la Caritas che al pront socors, se po fà mej de la Svezzia, con men de mort, men de ospedal pien e senza lassà nissun a la fam.
E l’è quella chi la critica, la pussee granda, che la ghe sia al modell svedes, no quella fàda de quej che, intant, inn no stad boni de tutelà né la salut, né l’economia.