Voramai poeudom dìll: el governo el par un circh. L’è no un fad politegh, ma real, che sem de destra, de sinistra o independent.
Hann aprovad i mesure i pussee dur d’Europa, perché “sedenò portom el virus di noni” però… Poeudom andà di noni.
Sarrom su de la sgent che la lavora – compagn di ristorator – inscì, tant per, senza nanca una situazzion epidemologega per giustifegàll.
Voeuri regordà che ‘l nost minister de la Salut, tra l’alter, l’ha lavorad no un dì in la soa vita. Se violter hii perdud in di milla, podii rengrazzià luu.
Poeu ghe dem i freguje per dìgh “vist che ‘l governo el gh’è”. La rabia la monta in di sgent. L’è un sentiment popolar, nanca partitegh: gh’è di sgent che i ha mandad su e ‘dess inn inversad compagn de mi e di alter sgent che han votad no vun di partid de la coalizzion gialda-rossa.
Intant, per i vacin, el super-comissari Domenegh Arcuri el met sgiamò i man inanz e ‘l dis che domà se “i sgent se comportarann ben” el ghe sarà. Che bella scusa, magara ghe disom anca “vacin? Che mangen i chifer”.
Una roba l’è, però, interessanta: inveci del voramai sacher DPCM han preferid doperà un pussee canonegh decret-lesg. Scrivud cont i part manch nobil del corp, publegad anca in sul sit de la Gazzeta Ofizziala con la data fallada, cont di boeugg che ghe podaria passàgh dent anca un treno-naveta Trenord, ma un DL.
Forsi han capid che ‘l sò governo l’è in sul fil del resô e che, soratut se la gh’è una terza ondada, gh’hann de andà a cà, se voeuren no vesser sbatud foeura de la folla cont i forcon, dopo che han ciapad per el nas i italian a digh “sem dree a ciapà i mesure parziai i pussee dure d’Europa per salvà el Denedal e evità el bloch general” e poeu fà un bloch general propi a Denedal e preferissen lassà al governo che ‘l vegn una parvenza de orden costituzzional inveci che ‘n Italia ligada man e pee, in d’un malad sgioeugh de bondage, con l’esecutiv ‘me master.