El scior Ricciardi, vun di tanc espert che gh’hem in Italia, l’ha did ciar e tond “grazzie Cina”.
Che vergogna! El sistema cines l’è stad quell che l’ha permetud al virus de andà in sgir liberament per mes, perchè la Cina l’ha preferid pensà ai sò afar de partid e a la soa imagin che a la salut mondial.
Poeu, quand che han capid che podeven no fà finta han tacad a fà i mesure draconian, a nonzià reforme (che hann fad no) e inscì via.
Poeudom dì, con bona probabilità, che se ‘l SARS-CoV-2 el fuss vegnud foeura, el soo no, a Taiwan el saria stad debon pussee limitad in la circolazzion.
E ‘l modell taiwanes, probabilment el pussee bon del mond, l’éra fondad in sul fidàss no de Pechin.
Alter che “grazzie Cina”.
Gh’hem de vesser ciar: la Cina l’è una ditatura senza elezzion: critegà i sò politegh el voeur no dì sbater via el lavorà di scienziad che inn mort per el virus, soratut grazzia ai scerne del governo.
L’è pussee gram che, in d’una democrazzia ocidentala, el sia normal lodà di sistema del sgener.Ma, forsi, in Italia sem sgiamò abituad, desgià che ‘l noster modell l’è stad in tra i pussee gram d’Europa, l’ha evitad no una mota de mort, l’ha limitad i libertà personai a nivell de “regim sudamerican” e l’ha sbatud sgiò l’economia e ‘l mangià de centiner de miller de familie ma, inveci de fà autocritega, fem un costant dàghela al nemis, jer i runner, incoeu la Svezzia, doman la “varianta inglesa”.
El Partid Comunista Cines el rengrazzia per havègh no de responder di so eror.