Hem sentud tant parlà de Stat de Dirit de ‘sti dì, con la storia di fond europee e del veto de ‘n quaj Paes de l’est propi per la question.
Ma menter che i oeugg de l’opinion publega inn pontad a Visegrad l’è ‘l governo italian che ‘l se destingh per disrespet del Stat de Dirit.
Se, a dì poch, la manera con la che l’è gestid el stat de emergenza l’è controversa, l’è però possibel trovà di argoment in d’un descor per legitimà i DPCM.
L’è inveci no possibel trovà una giustificazzion per la darera idea del governo, ciovè normà el moviment in tra i comun per FAQ.
La FAQ a l’è no un at, che ‘l sibia ministrativ o legislativ, inn di parolle scrivud in sul sit del governo.In teoria i FAQ servissen per dìgh ai sgent, in manera ciara, i contegnud di regole, menter che ‘l governo ja voraria doperà ‘me font del dirit deperlor.
Una roba del gener, pussee che per una democrazzia europea, la podaria andà ben per un forum di carton animad giapones. E l’è no una roba che la gh’ha de interessà domà una part politega: el cunta no se sem i pussee grand sostenitor del Cont o i sò pussee grand detrator o se sem per el lockdown o per el modell svedes: gh’è di robe che vegnen prima di noster idee, compagn di fondamenta di Stat del dì d’incoeu.
Se ‘sti fondamenta inn s’cepad inn s’cepad per tucc: anca el premier che ‘l vegn el podarà reclamà el poder de normà foeura del sistema costituzzional e di sò garanzie. E l’è no una roba impossibel: l’è propi quell che l’è sucedud cont el decret-lesg: grazzia a di governi che ‘l doperaven per tuscoss de istrument de emergenza l’è deventad la manera standard de passà la pupart di lesg.